ꐝꆹꐞꁧꂯ
ꐚꅪꉙꌒ/ꁱ
ꐙꇐꑸꆀ/ꀘ
ꐝꆹꐞꁧꂯ
ꃅꑍꅉꁮꋌꀋꄡ
ꃅꉖꅉꁮꋌꀋꌭ
ꄮꈉꏤꅉꑟꄷꆏ
ꐝꄮꑞꅉꑟꇀꌦ
——ꁱꂾꅇ
ꐝꆹꐞꁧꂯ
ꀊꆨꃆꌺꇂꇤꏜꋠꐋꃅꇈꌠ
ꀃꑍꀕꂷꑍꄷꐞꁧꂯ
ꀊꆨꍶꇁꑾꌺꋂꅝꐋꃅꇈꌠ
ꀃꑍꀕꂷꑍꄷꐞꁧꂯ
ꀊꆨꆫꃀꆫꌺꌧꈿꐋꃅꇈꌠ
ꀃꑍꀕꂷꑍꄷꐞꁧꂯ
ꀊꆨꀉꁌꇖꑳꑌꈩꐋꃅꇈꌠ
ꀃꑍꀕꂷꑍꄷꐞꁧꂯ
ꀊꆨꃈꇁꅩꌺꈜꈴꐋꃅꇈꌠ
ꀃꑍꀕꂷꑍꄷꐞꁧꃲ
ꀊꆨꂘꃀꌶꌺꌷꂘꐋꃅꇈꌠ
ꀃꑍꀕꂷꑍꄷꐞꁧꃲ
……
ꄚ
ꐝꆹꐞꁧꂯꑴꇬ
ꉂꅇꄜꌊꑓꁴꇱꇈꌠ
ꉌꃀꀀꅉꀀꇈꑴꌦꀞ
ꅇꏤꁱꌊꂷꋶꇱꇈꌠ
ꄯꒉꅑꅉꅑꇈꑴꌦꀞ
ꉪꐨꎭꌊꂘꃀꇰꇈꌠ
ꇬꇉꑋꅉꑌꇈꑴꌦꀞ
ꑭꐨꄔꌊꌶꅉꋉꇈꌠ
ꐪꊂꁭꅉꁮꇈꑴꌦꀞ
ꐝꆹꐞꁧꂯ
ꐞꊂꑓꁴꒉꂂꄓꌋꀋꌸ
ꌒꐪꊁꆹꇁꑴꌦ
ꐞꊂꉌꂵꂷꊂꌸꌋꀋꌸ
ꇿꐪꊁꆹꎍꑴꌦ
ꐞꊂꌷꐋꊂꊁꈘꌋꀋꌸ
ꋧꃅꀋꐞꆏ
ꐰꇑꑋꅉꑌꇀꄮ
ꈐꉘꉆꅉꉆꇀꄮ
ꊂꉇꋍꑍꂿꇁꉆꑴꌦ
